टर्कीको इस्तानबुल नजिकै मर्मारा सागरमा बुधवार बिहान दुईवटा व्यावसायिक जहाज आपसमा ठोक्किँदा चालक दलका १० सदस्य बेपत्ता भएका छन् ।
स्थानीय अधिकारीहरूकाअनुसार टर्कीको झण्डावाहक एक मालवाहक जहाज र एक ट्यांकर आपसमा ठोक्किएर उक्त दुर्घटना भएको हो । इस्तानबुल गभर्नरको कार्यालयले दिएको जानकारी अनुसार, स्थानीय समयअनुसार बुधवार बिहान करिव ३ बजे उक्त दुर्घटना भएको थियो ।
दुर्घटनामा संलग्न तुग्बर्क इमामोग्लु नामक मालवाहक जहाज ८०० देखि ९०० मिटर गहिरो पानीमा डुबेको अनुमान गरिएको छ । ४,१९९ टन क्वाइल्ड स्टिल बोकेको उक्त जहाज दक्षिण बन्दरगाह इस्कान्देरुनबाट टर्कीको ब्ल्याक सी तर्फ जाँदै थियो । दुर्घटनापछि उक्त जहाजसँग कुनैपनि सम्पर्क स्थापित हुन नसकेको र चालक दलका सदस्यहरू पनि सम्पर्कविहीन रहेको अधिकारीहरूले बताएका छन् ।
दुर्घटनामा संलग्न अर्को जहाज अल्सु नामक ट्यांकर हो, जुन कोकाएलीबाट इजमिर प्रान्तको अलियागा जिल्लातर्फ जाँदै थियो । ठक्कर खाएको समयमा उक्त ट्यांकर खाली रहेको र यसमा कुनै देखिने गरी क्षति नपुगेको पाइएको छ ।
बेपत्ताहरूको खोजी तथा उद्धार कार्यका लागि १४ वटा समुन्द्री खोज तथा उद्धार इकाइ र दुईवटा हेलिकप्टर परिचालन गरिएको छ । हाल उक्त क्षेत्रमा तीव्र रूपमा खोजी कार्य जारी रहेको गभर्नरको कार्यालयले जनाएको छ ।
