काठमाडौँ । बाजुराको बुढीगंगा नगरपालिकाको प्रशासनिक भवन निर्माणसम्बन्धी भ्रष्टाचार मुद्दामा तत्कालीन प्रमुख प्रशासकीय अधिकृतसहित पाँच जना दोषी ठहर भएका छन्।
विशेष अदालतले तत्कालीन प्रमुख प्रशासकीय अधिकृत प्रेमकाजी महर्जन, नगर प्रमुख दीपक विक्रम शाह, इन्जिनियर पारस खाती, सब–इन्जिनियर गणेश राज रेग्मी र जागृति निर्माण सेवाका प्रबन्ध सञ्चालक पुष्कर रोकायालाई दोषी ठहर गर्दै जनही तीन महिना कैद र १० हजार रुपैयाँ जरिवाना हुने फैसला सुनाएको हो।
नगरपालिकाको प्रशासनिक भवन निर्माणमा भएको भ्रष्टाचारसम्बन्धी मुद्दामा प्रतिवादी बनाइएका १४ जनामध्ये पाँच जना दोषी ठहर भएका हुन्। अन्य नौ जनाले भने सफाइ पाएका छन्।
सफाइ पाउनेमा तत्कालीन छैटौँ तहका प्रशासन अधिकृत नरेन्द्र नाथ, निमित्त प्रमुख प्रशासकीय अधिकृत कल्पना कुमारी ठकुल्ला, लेखापाल नवराज जोशी, खरिदार श्यामबहादुर खत्री र शिक्षा अधिकृत जयराज न्यौपाने रहेका छन्।
त्यस्तै, असिस्टेन्ट सब-इन्जिनियर भीमराज गिरी, नायब प्राविधिक सहायक सिद्धराज जैसी, तत्कालीन प्रशासन सहायक बसन्तबहादुर थापा तथा जागृति र एम।के। रनेपाल संयुक्त उपक्रमका काठमाडौँस्थित आधिकारिक प्रतिनिधि सुरतबहादुर शाहले पनि सफाइ पाएका छन्।
विशेष अदालतले भवन निर्माणसम्बन्धी भ्रष्टाचार मुद्दामा तत्कालीन जनप्रतिनिधि, कर्मचारी र निर्माण व्यवसायीलाई दोषी ठहर गरेको हो।
