मुगु। मुगु जिल्लाका विभिन्न सरकारी कार्यालयमा लेखापालको जिम्मेवारी सम्हाल्दै आउनुभएका कृष्ण सेजुवाल पछिल्लो समय जनताको भावना र चासोलाई नजिकबाट बुझ्ने कर्मचारीका रूपमा चर्चामा आउनुभएको छ।
आफ्नो जिम्मेवारीमा परिपक्व भएर काम गर्दै आउनुभएका सेजुवालले सरकारी कार्यालयको काममा मात्र सीमित नरही सार्वजनिक समस्या समाधानमा समेत प्रत्यक्ष सहभागिता जनाउँदै आउनुभएको देखिन्छ।
लथालिङ्ग सडकप्रति चासो
मुगु जिल्लाका ग्रामीण तथा मुख्य सडकहरू वर्षायामसँगै हिलाम्मे, बिग्रिएको र ठाउँ–ठाउँमा अवरुद्ध हुने समस्या लामो समयदेखि रहँदै आएको छ। सडकको अवस्था सुधार नहुँदा स्थानीय बासिन्दा, यात्रु तथा सवारी चालकले दैनिक सास्ती खेप्दै आएका छन्।
यही समस्याप्रति ध्यान दिँदै सेजुवाल आफैं हातमा बेल्चा लिएर सडक सफा गर्न तथा अवरोध हटाउन जुट्नुभएको छ। सरकारी निकायले मात्र समस्या समाधान गर्नुपर्छ भन्ने सोचभन्दा माथि उठेर आफूले सक्ने काम आफैंबाट सुरु गर्नुपर्ने सन्देश उहाँको व्यवहारले दिएको छ।
जनताको करबाट सञ्चालन हुने सरकारी सेवामा कार्यरत कर्मचारीले कार्यालयभित्रको जिम्मेवारीसँगै समाजमा देखिएका समस्याप्रति पनि संवेदनशील हुनुपर्ने स्थानीयको भनाइ छ।
सेजुवालको पछिल्लो गतिविधिले कर्मचारी र नागरिकबीचको सम्बन्ध अझ नजिक बनाउन सहयोग पुग्ने अपेक्षा गरिएको छ।
स्थानीयस्तरमा कृष्ण सेजुवाल जनताको भावना बुझ्न सक्ने र सामाजिक समस्यामा प्रत्यक्ष चासो राख्ने व्यक्तिका रूपमा रुचाइँदै गएको चर्चा हुन थालेको छ।
