ललितपुर । रचनाकार, संगीतकार, लोकगायक तथा नाटककार रत्न बेहोसी (रत्न बज्राचार्य)को निधन भएको छ ।
नेपाली तथा नेपाल भाषाको गीत-संगीत क्षेत्रमा लामो समयसम्म योगदान पुर्याएका बेहोसीको आज ९१ वर्षको उमेरमा निधन भएको नेवा: पत्रकार दवूका पूर्वअध्यक्ष एवम् सञ्चारकर्मी सुरजवीर बज्राचार्यले जानकारी दिए ।
नेपाली तथा नेपाल भाषा (नेवारी) गीत-संगीत क्षेत्रमा छ दशकभन्दा बढी समय योगदान पुर्याएका बेहोसी गायन, संगीत सिर्जना, रचना तथा नाटक क्षेत्रमा सक्रिय छन् । उनलाई नेपाली र नेपाल भाषाको सङ्गीत क्षेत्रका धरोहरका रूपमा स्मरण गरिन्छ ।
विसं २०१३ मा रेडियो नेपालमा स्वर परीक्षा उत्तीर्ण गरी त्यही दिन प्रत्यक्ष प्रसारणमा गीत गाउने सौभाग्य प्राप्त गर्ने अग्रणी गायकमध्ये उनी एक हुन् । कुल १७ जना प्रतिस्पर्धीमध्ये एकल गायकका रूपमा छनोट भएको उनको यो यात्रा नेपाली रेडियो सङ्गीतको प्रारम्भिक इतिहाससँग जोडिएको महत्त्वपूर्ण अध्यायका रूपमा रहेको छ ।
उनका चर्चित गीतहरूमध्ये ‘मलाई मेरो देशको सिन्दूर लाउन मन छ’ (भारती उपाध्यायसँग) र तीर्थकुमारी थापासँग गाएको नेपाल भाषाको चर्चित गीत ‘सु मदुगु ताक स्वया वा’ निकै लोकप्रिय छन् ।
पाटनको भिन्छबहालमा हुर्किएर हाल भोलढोका बस्दै आएका स्वर्गीय बेहोसीका दुई छोराहरू आनन्द र चेतन बज्राचार्य तथा छोरी मुनु बज्राचार्य छन् । स्वर्गीय बज्राचार्यको आजै पशुपति आर्यघाटमा अन्त्येष्टि गरिएको छ ।
त्यसअघि उनको पार्थिव शरीरलाई अन्तिम श्रद्धाञ्जलीका लागि यहाँको त्यागलस्थित नेपाल भाषा मंका खल:मा राखिएको थियो ।
