काठमाडौँ । सिरहाको गोल बजार नगरपालिका–२ गुरुधाम चोकस्थित पूर्व-पश्चिम लोक मार्गमा मोटरसाइकलको ठक्करबाट एक पैदल यात्रीको मृत्यु भएको छ । मृत्यु हुनेमा सिरहाकै बस्ने ७८ वर्षीय कमलबहादुर श्रेष्ठ रहेका छन् ।
बुधवार बिहान करिब ६ बजे कसहाबाट मिर्चैयातर्फ जाँदै गरेको प्रदेश १-०५-००१ प १६३६ नम्बरको मोटरसाइकलले बाटो क्रस गर्दै गरेका पैदल यात्रीलाई ठक्कर दिएको थियो ।
ठक्करबाट घाइते भएका श्रेष्ठलाई लाइफ लङ्ग अस्पतालमा सामान्य उपचारपछि थप उपचारका लागि विराटनगर रेफर गरिएको थियो । सुनसरी हरिनगरास्थित सरकारी अस्पतालमा चेकजाँच तथा ईसीजी गर्दा चिकित्सकले मृत घोषणा गरेका थिए । मृतकको शव प्रादेशिक अस्पताल लहान, सिरहातर्फ ल्याउने कार्य भइरहेको छ ।
मोटरसाइकल र चालक विमल कुमार चौधरीलाई इलाका प्रहरी कार्यालय गोल बजारको नियन्त्रणमा लई घटनाबारे थप अनुसन्धान भइरहेको छ ।
