काठमाडौँ । मनाङ सदरमुकाम चामेबाट माथिल्लो मनाङ जोड्ने सडकमा बाढीले पुल बगाएपछि अवरुद्ध आवागमन अस्थायी पुल निर्माण गरी सञ्चालनमा ल्याइएको छ।
चामेबाट माथिल्लो मनाङ जाने मार्गअन्तर्गत ठाडो खोलामा रहेको पुल बाढीले बगाएपछि नेपाली सेनाको नयाँ भैरवी दल गुल्मले अन्य सुरक्षा निकाय र स्थानीयसँगको सहकार्यमा अस्थायी पुल निर्माण गरेको हो।
अस्थायी पुल निर्माण सम्पन्न भएसँगै उक्त मार्गमा आवागमन पुनः सुचारु भएको नेपाली सेनाले जनाएको छ।
बाढीले पुल बगाउँदा चामेबाट माथिल्लो मनाङतर्फ हुने आवतजावत प्रभावित भएको थियो। त्यसपछि तत्काल आवागमन सञ्चालन गर्ने उद्देश्यले सुरक्षा निकाय र स्थानीयको संयुक्त प्रयासमा अस्थायी संरचना तयार गरिएको हो।
विपद्का कारण क्षतिग्रस्त पुलको स्थायी पुनर्निर्माण नहुँदासम्म अस्थायी पुलले स्थानीयको आवतजावत सहज बनाउने भएको छ।
