मौसममा आएको सुधारसँगै कास्कीस्थित विश्व प्रसिद्ध अन्नपूर्ण आधार शिविर (एबिसी) पदयात्रामा विदेशी तथा सार्क राष्ट्रका पर्यटकको चहलपहल उल्लेख्य रूपमा बढेको छ। अविरल वर्षाका कारण बिरेठाँटी, स्याउली बजार र किम्रुङ खोला लगायतका स्थानमा अवरुद्ध भएका सडक तथा पदमार्गहरू खुलाइएपछि पर्यटन आगमन सहज भएको हो। मनाङ र मनास्लु क्षेत्रका पदमार्ग पहिरोले प्रभावित भएपछि धेरै पर्यटकले वैकल्पिक गन्तव्यका रूपमा तुलनात्मक रूपमा सुगम मानिएको एबिसी रोजेका छन्।
छोम्रोङ पर्यटन व्यवस्थापन समितिका अनुसार हाल दैनिक करिब ३०० जना पर्यटक अन्नपूर्ण आधार शिविर पुगिरहेका छन्। एबिसी क्षेत्रमा रहेका ६ वटा होटल तथा लजहरूमा ३५० जनासम्म पर्यटक अड्याउने क्षमता रहेकाले व्यवसायीहरू पर्यटकको स्वागतमा व्यस्त छन्। पोखरा, नयाँपुल, घान्द्रुक र छोमरुङ हुँदै एबिसी पुग्ने सबै स्थायी तथा अस्थायी मार्गहरू सञ्चालनमा आइसकेकाले दसैँ सुरु भएसँगै आन्तरिक पर्यटकको आगमन पनि थप बढ्ने अपेक्षा गरिएको छ।
समुद्री सतहबाट ४,१३० मिटरको उचाइमा रहेको अन्नपूर्ण आधार शिविरबाट अन्नपूर्ण प्रथम, अन्नपूर्ण साउथ र माछापुच्छ्रे हिमशृङ्खलाको मनमोहक दृश्यका साथै गुरुङ संस्कृति र हिमाली जीवनशैलीको अनुभव लिन पाइन्छ। पर्यटकको चाप बढेसँगै स्वास्थ्य सुरक्षालाई ध्यानमा राखी गाउँपालिकाले माछापुच्छ्रे बेस क्याम्पमा प्राथमिक उपचार केन्द्र सञ्चालनमा ल्याएको छ। यस केन्द्रले उच्च उचाइका कारण हुने लेक लाग्ने (हाई अल्टिच्युड) समस्या र अन्य आकस्मिक स्वास्थ्य अवस्थामा पर्यटक तथा स्थानीयलाई तत्काल उपचार सेवा प्रदान गर्नेछ।
