काठमाडौं । अविरल वर्षाका कारण आएको बाढीपहिरोमा परेर हालसम्म ८३ जनाको मृत्यु भएको छ।
देशका विभिन्न स्थानमा आएको बाढीपहिरामा परेर ८३ जनाको मृत्यु भएको प्रहरी प्रधान कार्यालयले जनाएको छ ।
जसमा ३३ पुरुष र २५ महिला, २५ बालबालिका रहेका छन्। जेठ २८ देखि आज बिहानसम्म बाढीपहिरोमा परेर १०६ जना घाइते र पाँच जना बेपत्ता भएको प्रहरी प्रवक्ता, प्रहरी नायव महानिरीक्षक ९डिआईजी० दान बहादुर कार्कीले जानकारी दिए। घाइतेको देशका विभिन्न अस्पतालमा उपचार भइरहेको छ। बेपत्ता हुनेमा दुई पुरुष र तीन महिला रहेका छन्। उक्त समयमा बाढीपहिरोका कारण तीन सय ८४ पशु चौपायको क्षति भएको छ।
प्रहरी प्रवक्ता कार्कीका अनुसार एक सय ३९ घर र ५४ गोठमा क्षति पुगेको छ। पहिरोका कारण आठ सय ५८ घर विस्तापित भएका छन्। बाढीपहिरोमा परेकाको उद्धारका लागि हालसम्म पाँच हजार चार सय २८ प्रहरी परिचालन गरिएको छ। मुलुकको विभिन्न भागमा परेको अविरल वर्षाका कारण एक विद्यालय र दुई सरकारी भवनमा क्षति पुगेको छ भने, ४१ पुल बगाएको छ। यस्तै, एक सय ६१ घर डुबानमा परेको र एक सय १६ रोपनी जग्गा पुरिएको प्रहरी प्रधान कार्यालयले जनाएको छ।
अविरल वर्षाका कारण देशभर एक हजार एक सय १७ घटना घटेको र जसका कारण दुई हजार नौ सय ५४ घरपरिवार विस्तापित भएका । उक्त घटनामा रु १० करोड ७० लाख ४० हजार ९ सय बराबरको क्षति पुगेको प्रहरी प्रधान कार्यलयले जनाएको छ।
