काठमाडौं । त्रिशूली बस दुर्घटनामा ज्यान गुमाउने ८ मध्ये चार जनाको सनाखत भएको छ।
जिल्ला प्रहरी कार्यालय धादिङका प्रहरी प्रमुख एसपी गौतम मिश्रका अनुसार सनाखत भएका चार जनामा जिल्ला धादिङको गजुरी गाउँपालिका-८ का अन्दाजी २४ वर्षका सविन रम्तेल, पर्वतको मोदी गाउँपालिका-१ का १५ वर्षीया कृतिका शर्मा पौडेल म्याग्दीको रघुगंगा गाउँपालिका-३ का ५० वर्षीय थान बहादुर भण्डारी र कास्की फुलबारीका अन्दाजी २४ वर्षका सुमन थापा छन्।
बाँकी चार जनाको पनि परिचय खुलाउने प्रयास भइरहेको एसपी मिश्रले जानकारी दिए।
आज बिहान काठमाडौंबाट पोखरा हुँदै बेनी जादै गरेको प्रदेश ३-०१-००५ ख ९९५२ नम्बरको बस धादिङको गजुरी गाउँपालिका-२ मा दुर्घटना भई त्रिशूलीमा खसेको थियो।
