काठमाडौँ । बाराको निजगढ नगरपालिका–१२ राम थलीमा घरायसी विवादका क्रममा श्रीमान्को कुटपिटबाट एक महिलाको मृत्यु भएको छ ।मृत्यु हुनेमा ४७ वर्षीया सुकुमाया मोक्तान रहेकी छन् । घरायसी विवादका क्रममा उनका ५५ वर्षीय श्रीमान् विजय मोक्तानले लहराको टुक्राले प्रहार गरी कुटपिट गरेका थिए ।
कुटपिटबाट सामान्य घाइते भएकी सुकुमायाको स्थानीय मेडिकलका चिकित्सकलाई घरमै बोलाएर प्राथमिक उपचार तथा औषधि गराइएको थियो । उपचारपछि सोही दिन राति ८ बजे खाना खाएर सुतेकी सुकुमायालाई भोलिपल्ट बिहान ४ बजे श्रीमान् विजयले उठाउन खोज्दा नउठेपछि उनको मृत्यु भइसकेको खुलेको हो ।
घटनाबारे बिहान ६:४० बजे अस्थायी प्रहरी पोष्ट रतनपुरमा जानकारी गराइएको थियो । खबर प्राप्त हुनासाथ प्रहरी सहायक निरीक्षक (प्र.स.नि.) र इलाका प्रहरी कार्यालय निजगढबाट प्रहरी निरीक्षक (प्र.नि.) को कमाण्डमा प्रहरी टोली घटनास्थल पुगेको थियो ।
प्रहरीले आवश्यक कानुनी प्रक्रिया पूरा गरी शव पोस्टमार्टमका लागि प्रादेशिक अस्पताल बारा पठाएको छ । घटनामा संलग्न श्रीमान् विजय मोक्तानलाई प्रहरीले नियन्त्रणमा लिई थप अनुसन्धान अघि बढाएको छ ।
