काठमाडौँ । काठमाडौँका विभिन्न स्थानबाट प्रहरीले ३२ किलो ७३० ग्राम लागुऔषध खैरो हेरोइनसहित पाँच भारतीय नागरिकलाई पक्राउ गरेको छ।
लागुऔषध नियन्त्रण ब्युरो र प्रहरी प्रभाग नागढुंगाबाट खटिएको संयुक्त प्रहरी टोलीले सार्वजनिक यात्रुवाहक बसमा जाँच गर्ने क्रममा तीन जना र थप अनुसन्धानका क्रममा दुई जनालाई पक्राउ गरेको हो।
ब्युरोले शुक्रबार जारी गरेको प्रेस विज्ञप्ति अनुसार असोज २३ गते काठमाडौँको चन्द्रागिरि नगरपालिका-२ स्थित सुरुङमार्गबाट जनकपुर हुँदै काठमाडौँ आउँदै गरेको यात्रुवाहक बसमा जाँच गर्दा तीन भारतीय नागरिक लागु औषधसहित पक्राउ परेका थिए।
पक्राउ पर्नेमा भारतको बिहार प्रदेश, समस्तीपुर जिल्ला वडा नम्बर २५ का १९ वर्षीय पुष्पम प्रकाश, सोही स्थानका २५ वर्षीय महेश कुमार र १९ वर्षीय सोनु कुमार रहेका छन्।उनीहरूको साथबाट ३२ किलो ७३० ग्राम लागुऔषध खैरो हेरोइन बरामद भएको ब्युरोले जनाएको छ।
प्रारम्भिक अनुसन्धानपछि प्रहरीले काठमाडौँ महानगरपालिका-२२, सुन्धारास्थित एक होटलबाट थप दुई भारतीय नागरिकलाई पक्राउ गरेको छ। पक्राउ पर्नेमा भारतको झारखण्ड राज्यको गढिडीह गाउँपालिका-६ की २३ वर्षीया कृष्टि खड्की र २५ वर्षीया रामकृष्ण खड्की रहेका छन्।
प्रहरीले लागु औषधसँगै १ हजार ११० क्याप्सुल ट्रामाडोल, आठ थान मोबाइल र ७५ हजार २२० रुपैयाँ नगदसमेत बरामद गरेको छ।
पक्राउ परेका पाँचै जनालाई आवश्यक अनुसन्धान तथा कारबाहीका लागि प्रहरी वृत्त थानकोटमा बुझाइएको लागुऔषध नियन्त्रण ब्युरोका प्रवक्ता प्रहरी नायब उपरीक्षक जीवन निरौलाले जानकारी दिएका छन्।
प्रहरीले बरामद लागुऔषधको स्रोत, ओसारपसारमा संलग्न अन्य व्यक्ति तथा सम्भावित सञ्जालबारे थप अनुसन्धान गरिरहेको विषयमा भने विज्ञप्तिमा विस्तृत विवरण खुलाइएको छैन।
