काठमाडौँ । जल तथा मौसम विज्ञान विभाग, मौसम पूर्वानुमान महाशाखाका अनुसार पछिल्लो १२ घण्टाको अवधिमा लुम्बिनी प्रदेशका धेरैजसो स्थानमा भारीदेखि धेरै भारी वर्षा दर्ता गरिएको छ। महाशाखाले बिहीबार बिहान ६:१५ बजे सार्वजनिक गरेको पछिल्लो मौसमी बुलेटिनअनुसार लुम्बिनीका साथै कोसी र गण्डकी प्रदेशका विभिन्न भू-भागमा समेत भारी वर्षा भएको छ।
महाशाखाका अनुसार हाल नेपालमा मनसुनी वायुको प्रभाव सक्रिय रहेको छ। यसैका कारण कोसी, मधेस, बागमती, गण्डकी र लुम्बिनी प्रदेशका अधिकांश स्थानहरूमा हल्कादेखि मध्यम वर्षा निरन्तर जारी रहेको छ।
लगातारको वर्षाका कारण विशेष गरी लुम्बिनी, कोसी र गण्डकी प्रदेशका पहाडी क्षेत्रहरूमा पहिरो जाने, भू-क्षय हुने तथा नदीनाला एवं साना खोलाहरूमा पानीको बहाव उल्लेख्य रूपमा बढ्न सक्ने जोखिम रहेको छ। तसर्थ, नदी तटीय क्षेत्रका बासिन्दा तथा पहिरोग्रस्त र जोखिमयुक्त क्षेत्रमा बसोबास गर्ने सर्वसाधारणलाई उच्च सतर्कता अपनाउन मौसमविद्हरूले आग्रह गरेका छन्।
यस्तै, सहरी क्षेत्रमा ढल निकासको समस्याका कारण हुन सक्ने डुबान र यातायात सेवामा पर्न सक्ने आंशिक असरप्रति पनि ध्यान दिन सरोकारवाला निकाय र आम नागरिकलाई अनुरोध गरिएको छ। महाशाखाले आगामी २४ घण्टासम्म मौसमी अवस्थालाई निरन्तर अनुगमन गर्दै आवश्यक सूचना र चेतावनी जारी राख्ने जनाएको छ।
