काठमाडौं । नेकपा (एमाले) कर्णाली प्रदेश कमिटीको नयाँ नेतृत्वको लागि आज मतदान हुँदैछ ।
सुर्खेतमा जारी पार्टीको पहिलो कर्णाली अधिवेशनअन्तर्गत मतदान बिहान ८ बजेदेखि सुरु हुने निर्वाचन समितिले जनाएको हो ।
हिजो बेलुकी ६ बजेदेखि मतदान प्रक्रिया सुरु गर्ने भनिए पनि व्यवस्थापनको अभावका कारण मतदान हुनसकेन ।
कर्णालीमा अध्यक्षका लागि तीन जना, उपाध्यक्षका लागि तीन, सचिव दुई, उपसचिवका लागि तीन जनाबीच प्रतिस्पर्धा हुँदैछ । अध्यक्षका निम्ति कालीकोटका मीनबहादुर शाही, कालीकोटकै प्रकाश रोकाया र सल्यानका गुलाबजंग शाह चुनावी मैदानमा हुनुहुन्छ ।
कर्णाली प्रदेशसभा पूर्वसभामुख राजबहादुर शाही र कालीकोटका प्रेमबहादुर सिंहले अध्यक्षको उम्मेदवारी फिर्ता लिनुभएको हो । एमालेले कर्णालीको प्रथम अधिवेशनबाट पाँच पदाधिकारीसहित एक सय ३५ सदस्य चयन गर्नेछ ।
