काठमाडौँ । कञ्चनपुरको शुक्लाफाँटा नगरपालिका-८ पिल्लरीफाँटा आज जंगली हात्तीको बथानले दुईवटा घर भत्काएको छ ।
जंगली हात्तीको बथानले शुक्लाफाँटा नगरपालिका-८ का सूर्य चौधरी र महेश नेपालको घर भत्काएको स्थानीय निरज जप्रेलले जानकारी दिए । हात्तीको बथान अहिले पनि गाउँ नजिकैको बैजनाथ सामुदायिक वनमा रहेको उनले बताए । हात्तीले बस्तीमै पसेर घर भत्काउन थालेपछि स्थानीयवासी त्रासमा छन् ।
डिभिजन वन कार्यालय कञ्चनपुरका वन अधिकृत लक्ष्मीराज जोशीले स्थानीय प्रशासनसितको समन्वयमा हात्ती भएको क्षेत्रमा निगरानी बढाइएको बताए । हात्ती धपाउन शुक्लाफाँटा राष्ट्रिय निकुञ्ज र सुरक्षा निकायसित समन्वय गरिरहेको उनको भनाइ छ ।
डुबेर बालकको मृत्यु
यसैबीच कञ्चनपुरको बेदकोट नगरपालिकामा महाकाली सिँचाइको नहरमा डुबेर एक बालकको मृत्यु गएको छ ।
जिल्ला प्रहरी कार्यालय कञ्चनपुरका प्रवक्ता एवं प्रहरी नायब उपरीक्षक टेकबहादुर रावतले नहरमा डुबेर बेदकोट नगरपालिका-३ दैजीका आठ वर्षीय शाहिल ओखेडाको मृत्यु भएको बताए । नहरमा नुहाउने क्रममा उनको बुडेर मृत्यु भएको हो ।
