काठमाडौँ — अविरल वर्षा र बाढीपहिरोले पुर्याएको क्षति एवम् सर्वसाधारणको वास्तविक अवस्था बुझ्न नेपाली काँग्रेसका पूर्वसभापति शेरबहादुर देउवा शीर्ष नेताहरूको टोलीसहित नुवाकोट पुगेका छन्।
बाढी प्रभावित क्षेत्रको स्थलगत अवलोकन गर्दै देउवाले प्रभावित नागरिकका समस्या सुन्नुका साथै सरकारद्वारा सञ्चालित खोज, उद्धार, राहत तथा पुनर्निर्माण कार्यको स्थिति बुझ्न आफू भ्रमणमा आएको स्पष्ट पारेका छन्।
काँग्रेस शीर्ष नेतृत्वको टोली नुवाकोटमा देउवासँगै काँग्रेसका प्रभावशाली नेताहरू डा. शशांक कोइराला, डा. प्रकाशशरण महत, एनपी साउद र मोहनबहादुर बस्नेतलगायतको टोली नुवाकोट पुगेको छ।
कार्यकर्तासँग छलफल: प्रभावित क्षेत्रको निरीक्षणमा जानुअघि देउवाले नुवाकोटस्थित पार्टी कार्यालयमा स्थानीय नेता तथा कार्यकर्ताहरूसँग विपद् व्यवस्थापनबारे छलफल गरेका थिए।
राहत पहिलो प्राथमिकता: छलफलका क्रममा उनले संकटमा परेका नागरिकको उद्धार र तत्काल राहत वितरणलाई पहिलो प्राथमिकतामा राख्नुपर्ने बताए।
‘सरकार संवेदनशील हुनुपर्छ, ढिलासुस्ती भए आवाज उठाउँछौँ’ देउवाले विपद् प्रभावित क्षेत्रमा राहतसँगै क्षति पुगेका संरचनाको पुनर्निर्माणलाई तीव्रता दिनुपर्नेमा जोड दिएका छन्।
सरकारको भूमिकाप्रति लक्षित गर्दै उनले भने, “बाढीका कारण धेरै क्षेत्र प्रभावित भएका छन्। सरकारले प्रभावित नागरिकको वास्तविक आवश्यकता पहिचान गरी प्रभावकारी रूपमा काम गर्नुपर्छ। सरकार कत्तिको संवेदनशील छ र कसरी काम गरिरहेको छ भन्ने बुझ्न म आएको हुँ। सरकारको प्रतिकार्य चुस्त नभए हामी सशक्त रूपमा आवाज उठाउनेछौँ।”
