काठमाडौं । पूर्व प्रधानमन्त्री शेरबहादुर देउवा स्वदेश फर्किन लागेका बेला जेनजी आन्दोलन नेपालले उनीमाथि उठेका आरोप तथा विवादित प्रकरणको निष्पक्ष छानबिन गर्न सरकारलाई दबाब दिएको छ। जेनजीले देउवा विमानस्थलमा अवतरण गरेपछि नै कानुनी प्रक्रिया अघि बढाउनुपर्ने माग गरेको छ।
जेनजी आन्दोलन नेपालका विजय शाहले जारी गरेको वक्तव्यमा देउवाको निवासबाट ठूलो रकम बरामद भएको भनिएका सार्वजनिक विवरणको सत्यतथ्य तत्काल बाहिर ल्याउनुपर्ने उल्लेख छ। राजनीतिक पहुँचका आधारमा अनुसन्धान प्रभावित हुन नहुने भन्दै जेनजीले राज्यका निकायलाई स्वतन्त्र रूपमा काम गर्न आग्रह गरेको छ।
वक्तव्यमा देउवासँग जोडिएका भनिएका वाइडबडी, एनसेल, नक्कली भुटानी शरणार्थी र मेलम्चीलगायतका विषयमा समेत छानबिन हुनुपर्ने माग गरिएको छ। अनुसन्धानबाट कुनै कसुर पुष्टि भए सम्बन्धित व्यक्तिमाथि कानुनअनुसार कारबाही हुनुपर्ने जेनजीको भनाइ छ।
जेनजीले देउवाको आगमनलाई आफ्नो अभियानसँग जोड्दै बिहीबार बिहान ११ बजे त्रिभुवन अन्तर्राष्ट्रिय विमानस्थलमा भेला हुन समर्थकलाई आह्वान गरेको छ। उनीहरूले प्रदर्शन शान्तिपूर्ण हुने र अनुसन्धानका लागि सरकारमाथि दबाब सिर्जना गर्ने बताएका छन्।
आन्दोलनका क्रममा भएको मानवीय क्षति स्मरण गर्दै जेनजीले विगतका घटनामा जस्तै जिम्मेवार व्यक्तिहरूले राजनीतिक संरक्षण पाउने अवस्था अन्त्य हुनुपर्ने बताएको छ। उनीहरूले कानुनको कार्यान्वयनमा विभेद भए त्यसविरुद्ध आवाज उठाउने चेतावनी दिएका छन्।
देउवाको आगमनलाई लिएर विमानस्थल क्षेत्रमा सुरक्षा सतर्कता बढाउने तयारीसमेत भइरहेको बताइएको छ। सम्भावित भीड व्यवस्थापन तथा प्रदर्शनलाई ध्यानमा राख्दै सुरक्षा निकायले आवश्यक तयारी गरिरहेको जनाइएको छ।
जेनजीले भने राज्य पक्षबाट बल प्रयोग वा दमन भए त्यसको जिम्मेवारी सरकारकै हुने चेतावनी दिएको छ। साथै, देउवामाथि लगाइएका आरोपहरू अनुसन्धानबाट प्रमाणित नभएसम्म दोषी ठहर गर्न नमिल्ने भएकाले कानुनी प्रक्रियाबाटै विषय टुंग्याउनुपर्नेमा समेत जोड दिएको छ।
देउवाको स्वदेश फिर्तीसँगै जेनजीको प्रदर्शन र अनुसन्धानको मागले राजनीतिक वृत्तमा समेत नयाँ बहस सिर्जना गर्ने देखिएको छ।
