काठमाडौँ — नेकपा (एमाले) को बहुप्रतिक्षित पुनर्गठन कार्यदलको बैठक करिब एक महिनाको अन्तरालपछि शुक्रबार बिहान ११ बजे पार्टी केन्द्रीय कार्यालय, च्यासलमा बस्ने भएको छ।
गत फागुन २१ गतेको निर्वाचनमा भोग्नुपरेको पराजय र त्यसपछिको सांगठनिक पुनर्संरचनाका लागि सुझाव संकलन गर्न गत जेठ १० गते उपाध्यक्ष रामबहादुर थापा ‘बादल’को संयोजकत्वमा गठित कार्यदलले तयार पारेको प्रतिवेदनमाथि छलफल गर्न यो बैठक बोलाइएको हो।
१३ स्थानबाट सुझाव, महासचिव पोखरेलद्वारा मस्यौदा तयार
कार्यदलले सातवटै प्रदेश र गैरभौगोलिक क्षेत्र गरी कुल १३ स्थानबाट नेता-कार्यकर्ताका सुझाव संकलन गरेको थियो।
प्रतिवेदन लेखन: संकलित सुझावहरूलाई एकीकृत गरी प्रतिवेदन तयार पार्ने जिम्मेवारी कार्यदलका सदस्य-सचिव एवम् महासचिव शंकर पोखरेललाई दिइएको थियो।
प्रतिवेदन पेस: महासचिव पोखरेलले करिब एक महिना अघि नै प्रतिवेदनको मस्यौदा तयार गरी संयोजक थापालाई बुझाइसकेका छन्, जुन सार्वजनिक समेत भइसकेको छ।
अध्यक्ष ओली असन्तुष्ट, नयाँ मोड लिने संकेत
प्रतिवेदन सार्वजनिक भएसँगै एमालेभित्रको आन्तरिक बहस थप तातेको छ। स्रोतका अनुसार पार्टी अध्यक्ष केपी शर्मा ओली प्रतिवेदनका कतिपय विषयवस्तु र पुनर्गठनका एजेन्डाप्रति सहमत छैनन्।
शुक्रबारको बैठकमा ओली पक्षका नेताहरूले प्रतिवेदनका परिमार्जन वा छुट्टै परिपूरक प्रस्ताव/प्रतिवेदन पेस गर्ने सम्भावना रहेको बताइएको छ। यसले निर्वाचनपछिको एमाले पुनर्गठन, नेतृत्व र भावी कार्यदिशाको बहसलाई थप रोमान्चक र फरक मोडमा पुर्याउने देखिएको छ।
