एजेन्सी ।भारत, चीन, दक्षिण अफ्रिका, रूस र ब्राजिलको सम्मिलित ब्रिक्सको शिखर सम्मेलन मंगलबार सुरू भएको छ।
दक्षिण अफ्रिकाले आयोजना गरेको उक्त सम्मेलनमा अरू देशका शीर्ष नेता सहभागी भए पनि रूसी राष्ट्रपति भ्लादिमिर पुटिन भने उपस्थित भएनन्।
उनले मंगलबार सम्मेलनलाई भिडिओबाट सम्बोधन गरेका छन्।
द न्युयोर्क टाइम्सका अनुसार पक्राउ पर्ने डरले पुटिन दक्षिण अफ्रिका नगएका हुन्।
सन् २०२२ मा छिमेकी युक्रेनमाथि आक्रमण गरेका पुटिनलाई अहिले अन्तर्राष्ट्रिय अपराध अदालत (आइसिसी)ले पक्राउ पुर्जी जारी गरेको छ।
दक्षिण अफ्रिका आइसिसीको सदस्य राष्ट्र हो। त्यही कारण पुटिनले ब्रिक्स सम्मेलनमा भौतिक रूपमा भाग नलिएका हुन्।
